عمران خان کو معافی مانگنا ہوگی

تحریکِ انصاف کے چیئرمین عمران خان بھی پیسے کے گرویدہ نکلے۔اسے تحریکِ انصاف کےلئے بیرونی فنڈنگ کا  کمال کہیں۔۔یا کچھ اوربرمنگھم  میں پاکستانیوں سے خطاب کےدوران  عمران خان نے نہ صرف اوور سیز پاکستانیز کی تعریف میں زمین و آسمان کے قلابے ملائے،  بلکہ انہیں افضل ترین بھی قرار دے ڈالااپنے خطاب میں عمران خان نے کہا  بیرونِ ملک موجود پاکستانی پیسے بھیجتے ہیں، جس سے ملک چلتا ہے، اس لئے بیرونِ ملک موجود پاکستانی سب سے بہترین پاکستانی ہیں۔ کپتان کے اس بیان پر افسوس  کے سوا اور کیا کیا جاسکتا ہے کہ انہوں  نے  فیصلہ سنایا بھی تو پیسے کی بنیاد پر۔حقیقت یہ ہے کہ ان کی اس منطق نے ہر پاکستانی کا دل توڑ دیا ہے۔ ملک میں رہنےوالے سوچنے پر مجبور ہوگئے ہیں کہ کیا وہ بہترین پاکستانی نہیں، یہاں رہ کر مشکلات کا مقابلہ کرنےوالے ، بدترین سے بھی بدترین حالات میں ملک نہ چھوڑنےوالے ، اپنی اپنی حیثیت کے مطابق ملکی ترقی میں حصہ ڈالنے والے کیا بہترین پاکستانی نہیں ۔

خان صاحب یہ درست  ہے کہ بیرونِ ملک موجود پاکستانی قیمتی زرِمبادلہ بھجواتےہیں، جو ملک کے لئے بڑی اہمیت رکھتا ہے۔ لیکن حقیقت یہ بھی ہے بہترین پاکستانی وہ بھی ہیں جو مشکلات سے گھبرا کر باہر نہیں بھاگتے ۔یہیں رہ کر مقابلہ بھی کرتے ہیں اور  ملکی ترقی میں حصہ ڈالتے ہیں کھیتوں میں خون پسینہ بہانے والے، غریب کسان  کیا بہترین پاکستانی نہیں۔ ملک میں آئین اور قانون کی عمل داری کےلئے جن لوگوں نے ماریں کھائیں، لاٹھیوں سےجن  سرپھٹے، جسموں پر زخم سجے، جن کی زندگی کے قیمتی دن قید خانوں کی نذر ہوئے وہ سارے گئے بھاڑ میں ۔۔اور پیسے والے بہترین ہوگئے، خان صاحب کی پیسے والوں سے یہ محبت کوئی نئی بات نہیں۔ ان پر یہ الزامات ان کی پارٹی کے اپنے لوگ ہی لگاتے ہیں کہ جہانگیر ترین کے طیارے میں بیٹھ کر وہ غریب کارکنوں کو بھول جاتے ہیں۔ تازہ ترین مثال ان کی لندن یاترا بھی ہے۔ جس میں وہ اپنے ساتھ بھی پیسے والوں کو ہی لے کر گئے۔ جہاز میں علیم خان اور جہانگیر ترین کے ساتھ ان کی تصویر بھی یہی کہہ رہی ہے کہ پیسے والے ہی بہترین پاکستانی ہیں۔ عام پاکستانی کا دل توڑ کر جانےکپتان کون سے تبدیلی لاناچاہتے ہیں، اگر یہ بات جوشِ خطابت میں ان کے منہ سے نکل گئی ہے تو پھر انہیں یہ غلطی تسلیم کرکے معافی مانگنی چاہیئے۔

ارفع کریم

اُسے تو جانا ہی تھا

 بنجر زمین پر بھی بھلا پھول کھلا کرتے ہیں

بےاماں جنگل میں کب انسان بسا کرتے ہیں

اُسے جلدی بھی بہت تھی

اپنے سارے کام نمٹانے کی جلدی

بڑے بڑے ہنر دکھانے کی جلدی

 اپنے ابدی گھر جانے کی جلدی

اب تو بس یادیں ہیں

آنسو ،سسکیاں اور آہیں

لبوں پر مچلتی دعائیں ہیں

مقام تجھے ملے سب سے ارفع

 دنیا کا اصول پرانا ہے

جوآیا  اسے آخر جانا ہے

ایسی بیماری جس کا علاج صرف چھتر

ایک خطرناک دماغی بیماری ہے   جو پاکستان میں تیزی سے پھیلتی جارہی ہے۔

اس مرض کے جرثومے  پہلے صرف اقتدار ی جگہوں پر پائے جائے تھے ، اب تقریباً ہر پوش علاقے میں پھیل گئے ہیں  ، ۔یہ خطرناک جرثومے اچھے بھلے انسان کا دماغ خراب کردیتے ہیں۔ جیسے ہی دل و دماغ میں  گھستے ہیں۔مرض کی شدت  نمایاں ہوجاتی ہے۔اس مرض کی جانی پہچانی علامات    کثیر ہیں۔لیکن پہلا  اور فوری  اثر دماغ پر ہوتا ہے ،عقل رخصت ہوکر اسے مکمل طور پر خالی کردیتی ہے ۔خالی دماغ میں  غرور تکبر ،اناپرستی ، خود ستائشی  و نمائشی ،جہالت ، بے شرمی ،ڈھٹائی  ،حسد، نفرت اور جانے کیا کیا  نجس و مکروہ قسم  کا بھوسہ بھر جاتا ہے  ،   مریض  خود کو انسان سمجھنا چھوڑ دیتا ہے۔دوسرے انسان اُسے کیڑے مکوڑوں سے بھی کم تر ٹائپ  کی مخلوق دکھائی دینے لگتے ہیں  ۔جسمانی اثر  سب سے زیادہ گردن اور چہرے پر دکھائی دیتا ہے۔ گردن کے پٹھوں میں ایسا اکڑائو آجاتا  ، جیسا شاید سریا گھسانے سے بھی نہیں آتا ۔دل سے انسانیت ، رحم دلی ، ہمدردی ،خدا ترسی ، خدا خوفی ، عفو و درگذر  اور معاف کرنے کے جذبات ایسے غائب ہوجاتے ہیں   ،جیسے گدھے کے سر سے سینگ، دوسروں کو گدھا خیال کرتا ہے  مگر ضرورت پڑنےپر اسے باپ بنانے کو بھی تیار ہوجاتا ہے۔  اکثر مریضوں کا تو منہ ایسے بن جاتا جسے پنجابی میں فٹے منہ کہتے ہیں، ہونٹ ایسے زبردستی  بند رکھنے کی عادت پڑ جاتی ہے، جیسے منہ میں غلاظت بھری ہے ،جسے یہ عرق شیریں  و خوشبودار سمجھ کر ہونٹوں کو بھنچ کر  اندر ہی رکھنا چاہتا ہے۔ کچھ مریضوں  کے تو ناکوں کے نتھنے بھی ایسے پھولنے لگتے ہیں  ،جیسے بھینسا  کسی کو ٹکر مارنے سے پہلے  پھلاتا ہے، اکثر مریض تو دوسروں کو دیکھ کر سر بھی ہلاتے رہتے  اور ناک بھوں بھی  چڑھاتے  ہیں ،ردِعمل ایساہوتا ہے جیسے  چاروں طرف گندگی غلاطت پھیلی ہے اور باامرِ مجبوری اس پر آلتی پالتی مارے بیٹھے ہیں، حالانکہ معاشرے کی سب سے بڑی غلاطت اور گندگی یہ خود ہوتے ہیں۔  غصہ ناک پر دھرا رہتا ہے،جیسے ہی کوئی خلافِ مرضی کام ہوتا ہے ، ایسے بہنے لگتا ہے ، جیسے بچپن میں ان کا ناک بہتا تھا، فرق صرف یہ ہے کہ اس بہتی  ناک کو تو یہ چاٹ لیتے تھے ،لیکن غصہ کسی غریب  کی زندگی   چاٹ جاتا ہے، بیشتر مریضوں  کے ماتھے پر تیوریاں بھی دیکھی گئی ہیں۔ایسے مریضوں کی آنکھیں  پھٹ کر ایسے باہر نکلی ہوتی ہیں  جیسے  پھانسی پانےوالے مجرم کی آنکھیں  باہر نکل آتی ہیں۔عام خیال یہ ہے کہ کچھ کی آنکھوں میں  سور کا بال ہوتا ہے، بعض لوگ تو انہیں بھی سور کا بال خیال کرتے ہیں(یہ بال پنجابی والا پڑھا جائے)انہیں ہنستا مسکراتا ویسے کم ہی دیکھا گیا ہے۔ مگر دوسروں کو دکھ ،تکلیف ،درد دے کر مصیبت میں دیکھ کر سکون محسوس کرتے ہیں، ،انا کو تسکین ہوتی  ہے۔ باچھیں کھل کھل  جاتی ہیں، اگر کسی سے مطلب نکلوانا ہوتو  اُس سے پیار محبت، وفاداری کے اظہار کےلئے زبان  باہر نکال کر جلدی جلدی سانس لیتے ہیں، زبان سے پانی سے ٹپکتا بھی  دیکھا گیا ہے۔ شکل اور حرکات ایسی ہوتی ہیں جیسے کوئی کتا  وفاداری کا اظہار کرتا ہے ، دم ہلاتا ہے۔ان  کی دم کا پتہ نہیں ،ہلتی بھی ہے یا نہیں ،خیال میں اگر ہلاتے ہو تو اس کی خبر نہیں۔ ایسی ہی کیفیات ،اپنے سے بڑا فرعون دیکھ کر بھی ان کی ہوجاتی ہیں۔تنہائی میں گھبراتے ہیں، اور خلقت میں  گھبرانے کی اداکاری کرتے ہیں۔اطبا کے نزدیک ، ایسوں کی صحبت بھی مضر رساں  ہے،  جو ایسے مریضوں سے میل جول رکھتا ہے، ان کی صحبت میں اٹھتا بیٹھتا ہے۔ اس کے پاس مرض میں مبتلا ہونے کے وسائل نہ بھی ہو پھر بھی کچھ علامات ظاہر ہونا شروع ہوجاتی ہیں،  سو حکما کا عوام کو مشورہ یہی ہے کہ ایسوں کی صحبت سے بچا جائے، مرض کا  متفق علیہ علاج صرف   پنجابی کا چھتر ہے، وہ چاہے کسی بھی سائز ، کسی بھی ٹائپ کا ہو،  وقت کے ہاتھوں پڑے ، یا پھر انقلابِ زمانہ  یا عام عوام کے ہاتھوں ،مرض میں خاطر خواہ افاقہ ہوتا ہے، کچھ مریض پہلے چھتر پر چوں چوں کی آواز نکال کر کاٹنے کی کوشش  بھی کرسکتے ہیں ۔ مگر علاج پر اصرار اور تسلسل جاری رہے تو   تمام خطرناک جرثوموں کا خاتمہ کردیتا ہے ، دوا کی موزوں و موافق جگہ  سر ہی بتایا جاتا ہے، جہاں پڑنے سے عقل فوراً ٹھکانے آتی ہے اور خاطر خواہ فائدہ ہوتا ہے۔ مگر انقلابی حالات میں تو جہاں بھی پڑے زود اثر دیکھا گیا ہے۔

ایم کیوایم کا بااختیار خواتین ۔۔۔مضبوط پاکستان جلسہ

جئے ایم کیوایم۔۔۔تجھ میں تو ہے بڑا دم۔۔۔ ایک بار پھر چلا دیا بم۔۔۔بااختیارخواتین۔۔۔مضبوط پاکستان۔۔ کاکراچی میں سجا کر میدان۔۔۔۔ارے یہ جلسہ کئی عام جلسہ تھوڑی تھا۔۔وجود زن سےہے تصویر کائنات میں رنگ والےسارے رنگ یہاں بکھرے ۔۔ہرسو بکھرے۔۔اور کیا خوب بکھرے۔۔ان بکھرے رنگوں کو دیکھ کر یہ جلسہ سیاسی طاقت کا مظاہرہ کم ۔۔۔اور انٹرٹینمنٹ شو زیادہ لگا۔۔۔۔واہ الطاف بھائی دل خوش کردیا آپ۔۔بس تھوڑی سی قیامت ہی تو ڈھائی ۔۔اپنی پاٹ دار آواز میں خطابِ ظلم نشان کرکے۔۔جب بھائی کا خطاب چل رہاتھا۔۔۔اُس وقت تو ایسا لگ رہا تھا۔۔۔ جیسے سب کو سانپ ہی سونگھ گیا ہو۔۔۔یا سکتے کا حملہ ہوا ہو۔۔۔ارے جناب آپ کہیں غلطی سے بھائی کو سانپ نہ سمجھیں گا۔۔وہ توسات سمندر پار بیٹھے ہیں۔۔۔قوم کی خدمت کے جذبے سے سرشار بیٹھے ہیں۔یا لوگوں کو یوں لگا جیسے ان کےسروں پر پرندے بیٹھے ہیں ۔جو ذرا سی جنبش سے اڑجائیں گے ۔۔اور جس کا پرندہ اڑا۔۔پھربھائی کے چاہنےوالے اس کے بھیجا اڑا دیں گے۔اس بات کو چھوڑیں ۔۔لیکن یہ بات تو واقعی ماننا پڑے گی کہ جلسے میں خواتین کی شرکت نے سارے ریکارڈ توڑ دیئے۔۔ٹوٹتے بھی کیوں ناں ۔۔۔ کوئی بھی خاتون اپنے باپ بیٹے بھائی کی ہڈیاں ٹوٹتے تھوڑی دیکھنا چاہتی ہے ۔۔۔کیونکہ الطاف بھائی کہیں نہ کہیں ۔۔۔ان کا یہ خفیہ اعلان تو سب تک ہی پہنچ چکا تھا کہ جلسے کی کامیابی کیلئے کوئی گھرمیں نہیں رہے گا۔۔جورہا۔۔پھر اس کا گھر نہیں رہےگا۔۔جلسے میں جب الطاف بھائی الطاف بھائی کے نعرے گونجے ۔۔۔تونہ جانے کیوں مجھے ٹرک کے پیچھے لکھا یہ فقرہ رہ رہ کر یاد آیا کہ پاس کر یا برداشت ۔۔لیکن ٹی وی ریموٹ سنبھالے بندہ بھی کیا کرتا۔۔پاکستانی میڈیا پر تو جدھر دیکھتا ہوں تُو ہی تُو کا منظر تھا۔وہ توشکر ہے ہرآغاز کا انجام بھی ہوتا ہے۔۔۔اسی لئے جب بھائی کاتقریرنما بے سُرا راگ ختم ہوا تو پھرآئی سروں کی بہار۔۔بلکہ یوں کہیئے رقص و سرور پر نکھار۔۔لیکن کیا کریں پاکستانی بھی بڑے ظالم ہیں۔۔پورا کنجڑ خانہ معاف کیجئےگا جلسے کےبعد خواتین کا جشن آخر تک دیکھا اور اف تک نہ کی۔۔۔لیکن بعدمین عادت سے مجبورانگلیاں اٹھانے لگے کہ کیا بھائی یہی ہے وہ اختیار۔۔۔جو آپ خواتین کو دینا چاہتے ہیں۔اگر آپ کا جواب ہاں میں ہے تو پھر محب وطن پاکستانیوں کاجواب ناں ہی سمجھیں۔

خبروں سے آگے

یہ ہے قائد کا پاکستان !

جاپان کا سونامی ۔۔۔لیبیا پر عالمی برادری کے حملے ۔ الطاف حسین کا بیان۔۔لوڈشیڈنگ اور مہنگائی کےمارے عوام۔۔۔قتل ڈاکےاور ریمنڈکی رہائی پر عوام کی دہائی۔۔انقلاب کی باتیں انقلاب کے نعرے ۔۔۔سیاسی گرماگرمی اوردہشت گردی کیخلاف جنگ کی خبریں ۔۔۔۔۔۔سب کچھ پیچھے رہ گیا۔۔بہت پیچھے کیونکہ پاکستان آسڑیلیاسے میچ جو جیت گیا۔ قوم کاسڑکوں پر ۔۔۔۔۔۔جشن۔۔کیونکہ ۔یہ ہےقائد کا پاکستان۔۔۔ کرکٹ ہے اس کی جان

اک ننھی پری کا اللہ کے نام خط

میرے پیارے الله میاں……
میں تیرے نام لیوا علی اصغر بنگلزئی کی دس سالہ بچی ہوں جس نے اپنے باپ کا چہرہ صرف تصویر میں دیکھا ہے میں اپنی ماں کی کوکھ سے ابھی پیدا بھی نہیں ہوئی تھی کہ میرے باپ اپنے دوست کے ساتھ بازار سے گھر آتے ہوئے لاپتہ ہوگئے۔ میری بوڑھی ماں ، بھائی، چچا سمیت گھر کے تمام افراد کو علم نہیں کہ میرا باپ کہاں گیا ہے؟ ماں سے جب بھی سوال کرتی ہوں تو جواب میں ماں کی آنکھوں سے آنسو نکلتے ہیں جنہیں پونچھتے ہوئے میں ہمیشہ ماں سے وعدہ کرتی ہوں کہ پھر کبھی نہیں پوچھوں گی کہ ابا کہاں ہیں۔۔۔؟ یا کب آئیں گے؟۔
اللہ میاں۔۔۔۔ میرے بڑے تایا ابو پیشے کے لحاظ سے درزی ہیں وہ بتاتے ہیں کہ میرے ابو بھی درزی تھے لیکن ان کے ہاتھ کے سلے کپڑے میرے نصیب میں نہیں
تایا ابو سے جب پوچھتی ہوں کہ ابا کہاں ہیں اورکب آئیں گے۔۔۔۔؟ تو اپنی آنکھوں کے آنسوؤں پر ضبط کرتے ہوئے غصے سے بولتے ہیں کہ مجھے کپڑے سینے آتے ہیں اگر ہونٹ سینے کا ہنر جانتا تو میں تم سب کے ہونٹ سی دیتا تاکہ پھرکوئی یہ پوچھ کر میرے زخم تازہ نہ کرتا۔
اللہ میاں!میرے گھر والوں نے ابا کو کہاں کہاں تلاش نہیں کیا انصاف کیلئے ہر دروازے پر دستک دی میرے بڑے بھائی نے انصاف کے اداروں تک جا جا کر اپنی جوتیاں گھسا دیں اس نے ہمارے بہتر مستقبل کیلئے اپنی تعلیم ادھوری چھوڑ دی لیکن میں اچھی تعلیم نہیں ابا کا پیار مانگتی ہوں ابا کا جرم کیا ہے کسی کو کچھ علم نہیں لیکن سزا ہم سب بھگت رہے ہیں میرے گھر کی دیوار پر انگور کی لپٹی بیل کی طرح غموں نے ہماری زندگی کو جکڑ رکھا ہے ہماری کوئی نہیں سنتا اس لئے میں آپ کو چٹھی لکھ رہی ہوں شاید آپ میرے اباکو واپس لاسکو کیوں کہ میں اتنا جانتی ہوں کہ آپ کے سامنے ہاتھ پھیلانے والا کوئی بھی کبھی خالی ہاتھ نہیں لوٹا۔
فقط آپ کی رحمت کی طلب گار
زرجان
بنت علی اصغر بنگلزئی
سریاب روڈ کوئٹہ بلوچستان